சுட்டதும், சுடாததும்!

அண்மைய காலங்களில் இயற்கை அழிவுகள் பெருமளவில் நிகழ்ந்துள்ளன. இனிவரும் காலங்களில் இவை இன்னமும் அதிகரிக்கலாம் என மாறி வரும் வெப்பநிலையைக் காரணம் காட்டி ஆய்வாளர்கள் எச்சரிக்கின்றனர். இந்த இயற்கை அழிவுகள் தனியே இயற்கை சார்ந்தது மட்டுமல்ல, இயற்கையின் வழமையைச் சீர்குலைக்கும் மனிதரின் அசுர பொருளாதார வேகமும் இந்த அழிவில் பெரும் பங்கு வகிக்கிறது என்பது விரிவாகப் பேசப்பட வேண்டிய இன்னொரு விடயம்.

மழை, புயல், நிலநடுக்கம், மண்சரிவு… என்ற இயற்கை அழிவுகளுக்கும் ஏழை/பணக்காரருக்கும் சம்பந்தமிருக்கின்றதா என்று கேட்டால் இருக்கென்றே சொல்வேன். இயற்கை அழிவுகளின் பாதிப்புகள் பொருளாதார வேறுபாடுகளுக்கமையவே இருக்கின்றன.

இயற்கை தனது இலக்கை வறுமை/செல்வம் பார்த்து தெரிவு செய்யவில்லை. ஆனால் இயற்கை அழிவுகள் அடிக்கடி ஏற்படும் என்று அறியப்பட்ட இடங்களில் யார் வாழ்கிறார்கள் என்பது தெரிவு செய்யப்படுகிறது. இயற்கை அழிவுகளில் யாருக்கு பாதிப்பு, யாருக்கு உதவிகள் என்பதில் தேர்வு இருக்கிறது.

இந்த வருடம் அமெரிக்காவில் நியூ ஓர்லன் பகுதியில் புயல் பற்றிய எச்சரிக்கையின் பின் வாகன வசதியுள்ளவர்கள்/தூர இடங்களிலுள்ள நட்சத்திர விடுதிகளில் தங்கக் கூடியவர்கள் கூடிய சீக்கிரமே வெளியேறி தப்பிக் கொண்டார்கள். வறுமைக்கோட்டிற்குக் கீழுள்ளவர்கள் - பெரும்பான்மையான அவ்ரோஅமெரிக்கர்கள் - தப்பியோட வழியின்றி புயலில் சிக்கிக் கொண்டார்கள். இதேநேரம் பஸ் வண்டிகள் போன்ற அரச வாகனங்கள் டிப்போக்களில் முடங்கிக் கிடந்தன. வைத்தியசாலைகள், முதியோர் விடுதிகளில் இருந்தோரும் ஏழ்மையான பிரதேசம் என்றபடியால் கவனிக்கப்படாது உயிரிழந்தார்கள். இங்கே புயலில் யாரின் உயிர் முக்கியம் என்பதை அவர்களின் பொருளாதாரமே தீர்மானித்தது.

உலகின் சனாயக காவல்காரனாகத் தன்னைத்தானே அறிவித்துக் கொண்ட அமெரிக்காவில் கறுப்பின மக்கள்/ஏழைகள் எந்த உதவியும் இல்லாமல் ஒரு வாரத்திற்கும் மேலாகத் தெருக்களில் பிணங்களோடு செய்வதறியாது தத்தளித்துக் கொண்டிருந்ததை வெளிநாட்டு தொலைக்காட்சிகள் நேரடி ஒளிபரப்புச் செய்து கொண்டிருந்தன.

அரச உதவிகள் எதுவுமே கிடைக்கப் பெறாமல், குடிக்க குடிநீருக்காக கடையை உடைத்த அவ்ரோஅமெரிக்கர்கள் கொள்ளையர்கள்/கிறிமினல்களாகவும் வெள்ளை அமெரிக்கர்கள் தமது தாகத்தைத் தீர்க்க எடுப்பதாகவும் ஊடகங்களால் சித்தரிக்கப்பட்டார்கள். உணவுப் பொருட்களை வெள்ளையல்லாத அமெரிக்கர்களிடமிருந்து பாதுகாப்பதற்காக இராணுவமும் அனுப்பி வைக்கப்பட்டது. கதரினாவுடன் அமெரிக்காவின் முகமூடி மீண்டும் கிழிந்தது.

அமெரிக்காவை புயல்/சூறாவளி தாக்க முன்பும், பின்பும் கியூபாவையும், மெக்ஸிக்கோ, எல்சல்வடோர் மற்றும் தென்னமெரிக்கா நாடுகளையும் மோசமாகத் தாக்குகிறது. எண்ணிக்கையிலும் பெருமளவு மனித இழப்புகளுடன் பாதிக்கப்படும் இந்நாடுகள் தொலைக்காட்சிகளில் மின்னி மறைந்து அமெரிக்காவின் நேரடி ஒளிபரப்பே முழுவதுமாக இடம் பிடித்துக் கொள்ளும். அமெரிக்காவின் புளோரிடா மாநிலத்திலிருப்பவர்களைப் போல இந்த நாட்டு மக்களுக்கு ஒன்று போனால் மற்றது என்று பல வீடுகள் இல்லை. சேதமடைந்தவையைத் திருத்த/புதிதாகப் பெற்றுக்கொள்ள காப்புறுதி இல்லை. குறிப்பாக அமெரிக்காவைப் போலவே இயற்கை அழிவைத் தொடர்ந்து முகம் கொடுத்துவரும் கியூபா மீது அமெரிக்காவினதும், ஐ.நா.வினதும் பொருளாதார, மருந்துத்தடைகள் நீக்கப்படாமலேயுள்ளன.

கடந்த வருடம் சுனாமி அழிவு பலரது கவனத்தையும் ஈர்த்ததில் அழிவு நடந்த பிரதேசங்கள் உல்லாசப் பிரயாணங்களுக்குரிய இடங்கள் என்பதும் முக்கியமானது. இதனால் உலக ஊடகங்கள் கொடுத்த முக்கியத்துவத்தில் அரச உதவிகளுக்கு இணையாக பொதுமக்களின் உதவியும் குவிந்தது. ஆனால் மிக விரைவில் புனர்நிர்மாணம் அடைந்தவை உல்லாசப் பிரயாணிகளுக்கான நட்சத்திர விடுதிகளும் மேற்படி நாடுகளின் அரசுகளும்தான். அழிவில் பாதிக்கப்பட்ட உள்நாட்டுமக்கள் வைத்தியசாலைகளில் இடமின்றி தெருக்களில் வைத்திய உதவியை எதிர்பார்த்து காத்திருந்தபோது உல்லாசப்பிரயாணிகளை மட்டும் அந்தந்த நாட்டு விமானங்கள் வைத்தியருடன் வந்து ஏற்றிச்சென்றன. இந்தியாவில் உயிரிழந்தவர்களில் தலித்துகளைத் தொட்டுத் தூக்கி ஒன்றாகப் போட்டுக் கொளுத்த வேறு பிரதேசங்களிலிருந்து தலித்துகள் கொண்டுவரப்பட்டார்கள். இதேநேரம் வெளிநாட்டவரின் உடல்கள் சிறப்பு வைத்தியநிபுணர்கள் தருவிக்கப்பட்டு அடையாளம் காணப்பட்டு மரியாதையுடன் புதைக்கப்பட்டன. இயற்கை அழிவினால் உயிரிழந்தவர்களின் பிணங்கள் கூட சாதி/இன/தேசிய அடையாளங்களை வைத்தும் பொருளாதார ஏற்றத்தாழ்வுகளுக்கு ஏற்பவுமே அடக்கம் செய்யப்பட்டன.

இப்போது காஷ்மீரில் நிலநடுக்கத்தில் 80,000 இற்கும் மேற்பட்ட மக்கள் உயிரிழந்துள்ளனர். எதிர்பார்க்கும் உதவி கிடைக்காவிட்டால் வர இருக்கும் குளிர் இன்னும் பல உயிர்களைப் பலிகொள்ளப் போகிறது என்று ஐ.நா. தொடர்ந்து எச்சரித்துக் கொண்டிருக்கிறது. எரிபொருளுக்குரிய பணம் கிடைக்காததால் ஹெலிக்கொப்ரர்கள் பறப்பதை நிறுத்திவிட்டன என்று ஐ.நா தெரிவிக்கிறது. இதேநேரம் பாகிஸ்தானின் அடுத்த எல்லை நாடான அப்கானிஸ்தானிலும், ஈராக்கிலும் ஹெலிக்கொப்ரர்களும், விமானங்களும் எந்த எரிபொருள் பிரச்ச்சினையுமின்றி குண்டு போட்டுக்கொண்டிருக்கின்றன. ஈராக்கிலும், அப்கானிஸ்தானிலும் யுத்தத்திற்கு நாளொன்றுக்கு கோடிக்கணக்கில் செலவழித்துக் கொண்டிருக்கிறார்கள். காஷ்மீரிலோ குளிரில் அடுத்த நேர உணவுக்கு ரொட்டித் துண்டை எதிர்பார்த்து தெருவில் மக்கள் காத்திருக்கிறார்கள்.

காஷ்மீரில் பாதிக்கப்பட்ட மக்கள் வாழ்ந்த பிரதேசம் உல்லாசப் பிரயாணிகளின் பிரபலமான இடமல்ல. உயிரிழந்தவர்களும், பாதிக்கப்பட்டிருப்பவர்களும் வறிய மக்கள். உதவி என்ற பெயரில் அமெரிக்காவோ, ஐரோப்பாவோ பாகிஸ்தானுக்குள் நுழைய வேண்டியதில்லை. ஏற்கெனவே அவர்கள் புகுந்து விட்டார்கள். ஆக மொத்தத்தில் இந்த மக்களை யாருக்கும் தேவைப்படவில்லை. விளைவு, ஊடகங்களில் செய்தி மறைந்துவிட்டது. ஐ.நா.கேட்கும் நிதியை கொடுப்பார் யாருமில்லை. ஐ.நா.வும் தனது நிதியை முதலிடத் தயாராயில்லை. நிலநடுக்கத்தில் கொல்லப்பட்ட மக்கள் போக, இனி வர இருக்கும் குளிரில் இறந்தவர்களின் தொகை என்று ஒரு கணக்கீடு மட்டும் காட்டுவார்கள்.

இலங்கையில் சுனாமியால் உயிரிழந்த/தொழிலைப் பறிகொடுத்து நிர்க்கதியாகியுள்ள சிங்கள/தமிழ்/முஸ்லீம் மீனவக் குடும்பமோ அல்லது மொன்சூன் மழை-வெள்ளத்தில் தங்கியிருந்த இடத்தையும் இழந்துபோன தாய்வானின் சேரி வாழ் மக்களோ, இயற்கை அழிவைப் பொறுத்தவரையில் கூலிகள், ஏழைகள், தலித்துகள் என்போர் …….. வெறும் எண்ணிக்கை மட்டும்தான்.

Technorati Tags: தமிழ்ப்பதிவுகள் தமிழ்